ANTES DE COMEZAR…
A 3DO é unha máquina curiosa e cara de conseguir, xeralmente esquecida ou lembrada de forma negativa. Por iso decidín probar o seu catálogo e ver ata que punto era certo o que se di, pero, como sempre cos sistemas que venderon pouco, é complicado localizar de forma fiable o catálogo completo. Por esta razón, o top está elaborado probando todos os xogos que atopei, pero pode que me perdese algún.
Como sempre, os criterios de elaboración son sobre todo persoais e, aínda que procurei ordenar un pouco os xogos segundo os meus gustos, a orde non ten maior importancia, sobre todo nos postos baixos. Outros criterios que tomei:
-Que hoxe en día se poidan xogar, aínda que sexa minimamente.
-Descartei os xogos de mesa e tamén as películas interactivas, aínda que pode haber excepcións.
-Descartei a maioría dos simuladores de deportes, que non domino ou non me gustan.
-Algúns títulos están en cor vermella: significa que o xogo ten polo menos unha protagonista feminina controlable.
-O número de xogadores refírese a partidas simultáneas; non se teñen en conta as partidas por quendas.
Actualizado: 06/03/2024
¡Comezamos!
56. Johnny Bazookatone (1995)
Ao primeiro contacto, este título parece un xogo de plataformas tradicional, desfasado para o seu ano de lanzamento, pero se se explora descóbrese un deses xogos estraños pola súa historia e ambientación (un roqueiro que busca recuperar a súa guitarra no inframundo). É un xogo bastante difícil, a diferenza doutros xogos de plataformas de desprazamento lateral, e o seu control podería ser algo mellor, pero é outra achega 2D máis que correcta na xeración da moda 3D e por iso merece unha mención.
55. Shock Wave & Shock Wave: Operation Jumpgate (1994-1995)
Simuladores de combate espacial e dos mellores xogos do sistema. O primeiro é o título orixinal, mentres que Operation Jumpgate foi unha expansión con novas misións e escenarios. No xogo, aos mandos dun caza F-177, o xogador debe destruír os alieníxenas. Para iso pode empregar láseres ou mísiles, sempre atento á cantidade de munición e combustible, que pode repoñer nun depósito de subministracións se é necesario. No primeiro xogo as misións transcorren por todo o planeta Terra e na expansión os escenarios lévannos ao espazo exterior.
54. Syndicate (1995)
Xogo táctico e estratéxico en tempo real no que o xogador dirixe varios mercenarios cibernéticos a través de contornas isométricas con ambientación cyberpunk. Ademais de guiar os personaxes no campo, o xogo tamén ten como obxectivo a conquista de territorios e a obtención de recursos para investigar e desenvolver novas armas para o escuadrón. Estes territorios poden rebelarse e terás que conquistalos de novo, polo que debes ser estratéxico con canto os presionas para obter fondos. Non admite control con rato, o que lle fai perder bastantes puntos fronte á versión para PC.
53. John Madden Football (1994) (2 xogadores)
A 3DO foi durante un tempo a mellor consola para xogos deportivos e este John Madden foi un dos seus mellores representantes: levaba a simulación de fútbol americano a un novo nivel de realismo polo seu gran salto gráfico naquel momento. Contaba coa licenza da NFL e incluía tamén equipos históricos.
52. Psychic Detective (1995)
Este título descarteino nas orixes do top por estar en inglés falado sen ningún tipo de subtítulo. Pero o certo é que merece máis representación en internet, porque é unha das poucas aventuras FMV ben levadas e moi orixinal. Es Eric Fox, un detective psíquico que pode transmitir o seu eu psíquico aos demais para ver a través dos seus ollos e oír a través dos seus oídos. Desa maneira pode descubrir cousas sobre o caso que doutra forma non podería. Isto permítelle ao xogador saltar á mente das persoas próximas e continuar a historia desde a súa perspectiva, é dicir, ir saltando de persoa en persoa para descubrir os misterios do xogo desde os diferentes puntos de vista das ducias de personaxes. ¡Oxalá algún día o poidamos xogar en castelán!
51. The Lost Files of Sherlock Holmes (1994)
Se che apaixonan as novelas de misterio e a clásica serie de Sherlock Holmes, non podes perder esta aventura gráfica point&click na que Sherlock e o seu fiel compañeiro, o Sr. Watson, deben investigar o asasinato dunha moza actriz cun modus operandi semellante ao de Jack o Destripador.
50. Icebreaker (1995)
Unha especie de shoot'em up con vista isométrica 3D no que os xogadores controlan unha pequena pirámide branca que debe destruír outras pirámides de diferentes cores que hai no campo; cada cor implica que a forma de destruír esa pirámide é diferente e única.
49. Guardian War (1994)
Un dos dous xogos de rol en inglés dispoñibles para a 3DO. Aínda que, para ser precisos, este título non é un xogo de rol puro, senón máis ben un xogo táctico con elementos de rol. Hai moi poucas conversas durante a partida, só monólogos da deusa, dos mercadores e dos xefes. A historia de fondo é igual de escasa, indo de batalla en batalla, pero ten algunhas características que o fan bastante divertido e, por suposto, en tres dimensións.
48. PGA Tour 96 (1995)
Un dos primeiros saltos do golf ás tres dimensións. Aínda que segue usando gráficos prerenderizados para representar os deportistas, segue sendo unha das mellores experiencias deportivas deste catálogo e verdadeiramente next-gen comparado cos simuladores dos sistemas de cuarta xeración.
47. Casper (1996)
Videoxogo baseado na película homónima que nos transporta á misteriosa mansión Whipstaff. Os xogadores asumen o papel do pantasma Casper, explorando os corredores e cuartos da casa encantada e resolvendo quebracabezas. Aínda que non revolucionou o xénero, o seu encanto fai que moitos afeccionados o queiran.
46. Crime Patrol & Drug Wars & Mad Dog & Mad Dog II (1993-1994) (2 xogadores)
Catro xogos para pistola de luz desenvolvidos por American Laser Games: son aventuras que se caracterizan polo emprego de actores reais e, aínda que hoxe en día as súas interpretacións e a súa calidade gráfica poden parecer pobres, eran das apostas gráficas máis punteiras a principios dos 90.
45. Defcon 5 (1996)
Unha aventura FPS con ambientación de ciencia ficción que pon o protagonista no aperto de ter que defender unha base espacial de diversos asaltos dun inimigo descoñecido; para iso debe empregar as torretas defensivas da base e, entre vaga e vaga inimiga, atopar claves que permitan aumentar o número de torretas e melloralas.
44. Novastorm (1994)
Un shooter sobre raís cuxas contornas son imaxes prerenderizadas, un recurso moi usado na época para aumentar o realismo e que case sempre envelleceu moi mal. Neste xogo pásalle porque os obstáculos das imaxes son interactivos e, se non os esquivamos, a nosa nave sofre danos.
43. DOOM (1996)
Pouco se pode dicir do FPS máis famoso dos anos noventa: como sempre, debiamos avanzar por mapas labirínticos eliminando calquera cousa que se puxese a tiro, cunhas altas doses de violencia para a súa época. A versión de 3DO ten un son incrible e un control decente, pero por algunha razón a fluidez non é de todo boa e, para máis inri, usa un HUD enorme que reduce a pantalla de xogo. Segue sendo DOOM e segue sendo divertido, pero non foi a súa mellor conversión.
42. Wing Commander III (1995)
A saga Wing Commander é de sobra coñecida polos xogadores de PC por ser un dos mellores simuladores de voo e combate espacial da historia. O xogo desenvólvese ao longo de varias misións que consisten sobre todo en voar cara a determinados lugares e eliminar inimigos; o fracaso ou o éxito altera o curso da trama. Ademais, entre misións podemos movernos pola base e conversar con outros personaxes.
41. Slam ‘N Jam 95 (1995) (2 xogadores)
Un simulador de baloncesto que busca representar a profundidade da pista con moito acerto; conta con bastantes opcións e un manexo cómodo. Foi bastante rompedor para a súa época e puxo a primeira pedra dos novos simuladores deste deporte que chegaron coa xeración dos 32 bits.
40. PO’ed (1995)
Un clon do famoso DOOM en clave de humor no que encarnamos o cociñeiro dunha nave espacial atacada por alieníxenas. O deseño escabroso dos inimigos, un incrible repertorio de armas pouco convencionais e varias situacións cómicas son os seus maiores puntos fortes; en cambio, a súa curva de dificultade e o seu esquema de controis son un gran problema durante as primeiras horas.
39. Lemmings (1994)
Os lemmings son unhas criaturas que só saben camiñar, rebotar contra os obstáculos e obedecer as nosas ordes. Con esta premisa, o xogo proponnos levalos a salvo ao final de cada nivel dándolles ordes como escavar ou construír escaleiras. A dificultade estaba en que tanto o tempo como as nosas ordes estaban limitados segundo o deseño da fase.
38. Blade Force (1995)
Xogo de acción con gráficos 3D que mantén unha fluidez sorprendente para o sistema. Ademais, envelleceu bastante ben, é cómodo de xogar e divertido. Controlamos un helicóptero sobre unha cidade na que debemos eliminar os inimigos, cunha historia narrada a través de cinemáticas.
37. Space Hulk: Vengeance of the Blood Angels (1995)
Título que ofrece un FPS táctico no que o xogador, controlando o comandante dun escuadrón de marines espaciais, debe derrotar todos os alieníxenas en naves claustrofóbicas ao longo de montóns de misións. É un xogo moi, moi difícil, pero único dentro do catálogo.
36. Foes of Ali (1995) (2 xogadores)
Non son experto en simuladores de boxeo, pero este sorprendeume por ser a primeira pedra do xénero en 3D e porque os gráficos son rechamantes para a súa época; chamoume a atención que, cando se encaixan golpes, hai un efecto de pingas de suor salpicando. O modo carreira está protagonizado por Ali e temos que derrotar os seus grandes rivais da vida real; conta tamén con modo exhibición e torneo para ata dous xogadores.
35. Panzer General (1995)
Un clásico dos videoxogos de estratexia por quendas ambientado na Segunda Guerra Mundial e considerado por moitos o mellor do xénero. Encarnamos un xeneral do exército nazi e debemos manexar diversas unidades para cumprir diversos obxectivos; a forma en que superemos cada fase influirá nas seguintes de cada campaña, por exemplo con unidades con máis experiencia ou un maior número de unidades novas.
34. Crash’n Burn (1993)
Un xogo de carreiras futuristas en tres dimensións e un dos xogos máis potentes do lanzamento da máquina. Conta con seis circuítos e seis pilotos para escoller, cada un co seu propio vehículo equipado con armas diferentes.
33. Captain Quazar (1996)
Un shooter en terceira persoa con perspectiva isométrica protagonizado por Quazar, un policía espacial que terá que eliminar e esnaquizar todo o que atope ao seu paso por diversos planetas. Todo iso en clave de humor ou parodia, cunha boa xogabilidade e unha música pegadiza.
32. Trip’D (1995) (2 xogadores)
Un clon semellante ao clásico Puyo-Puyo, é dicir, un xogo de quebracabezas no que temos que xuntar por cores grupos de bólas que aparecen de tres en tres para rompelas e evitar que se acumulen ata tocaren o bordo superior da pantalla.
31. The Incredible Machine (1994)
Este produto toma como idea central o efecto dominó e proponnos resolver máis de cen quebracabezas nos que debemos colocar multitude de obxectos, como pelotas, gomas ou foles, entre moitos outros, para que se desenvolva unha reacción en cadea e cumprir diversos obxectivos. Esta versión, ademais, ten gráficos mellorados con respecto ao orixinal para ordenadores.
30. D (1995)
D foi un dos xogos máis estraños e novidosos do seu tempo; hoxe en día non é máis ca unha aventura gráfica representada a través de múltiples secuencias FMV con escenas de terror e estrambóticas. Controlamos a Laura e temos que explorar un castelo no que hai que superar diversas trampas mortais contrarreloxo, xa que só temos media hora para superar cada un dos CD que compoñen esta obra. Segue sendo unha experiencia recomendable, aínda que o paso dos anos lle restase realismo.
29. Escape from Monster Manor (1993)
Este shooter en primeira persoa foi deseñado para amosar o potencial da 3DO. O xogo bebe moito de DOOM, coa busca de chaves para poder avanzar por unha mansión labiríntica chea de pantasmas e outras abominacións que debemos eliminar. Non é tan intenso nin tan variado coma outros do catálogo, pero ten unha ambientación conseguida e supón un reto para calquera amante dos shooters clásicos.
28. Total Eclipse (1994)
Un shoot'em up espacial en tres dimensións e con gráficos texturizados que demostraba o salto gráfico con respecto ás consolas de 16 bits (o Starfox de Snes era recente). O xogo alterna fases en mapas abertos, nos que temos bastante liberdade de movemento, con outras en túneles estreitos nos que debemos ter reflexos para evitar os obstáculos.
27. Shockwave 2: Beyond the Gate (1995)
Este FPS supera en todo a súa primeira parte, tamén dispoñible para 3DO: mellora os controis e os gráficos, especialmente o campo de visión. Pero, ademais, achega unha maior variedade ás misións, que debemos cumprir con varios vehículos e armas.
26. Yuu Yuu Hakusho (1994) (2 xogadores)
Un xogo de loita 2D baseado nun anime e exclusivo do territorio xaponés. Non atopei demasiada información sobre el e non son experto en xogos de loita, pero os personaxes están ben animados, vai con fluidez e os combos dos ataques resultáronme sinxelos. En cambio, non ten demasiada variedade nin de personaxes nin de ataques especiais.
25. Slayer (1994)
O mellor que imos atopar na 3DO en exploración de masmorras, rol e acción. O xogo introdúcenos en masmorras cuxa dificultade podemos configurar e que debemos explorar para saír airosos evitando trampas e enfrontándonos a diversos inimigos e, por suposto, a xefes finais. Porén, a súa curva de dificultade é alta e require paciencia.
24. Return Fire (1995) (2 xogadores)
Un shooter bélico en terceira persoa no que temos que combinar as diferentes funcións de catro vehículos militares para explorar e acabar coas forzas inimigas co obxectivo de capturar a súa bandeira e volver á nosa base sans e salvos. Ten unha das mellores bandas sonoras do catálogo, composta por música clásica, e tamén un dos poucos modos multixogador a pantalla partida que pagan a pena.
23. Flashback: The Quest for Identity (1993)
Un dos xogos máis importantes do seu tempo, que combina con moito acerto acción, plataformas e quebracabezas a través de niveis variados, como unha selva ou un laboratorio. Pero a súa maior virtude é un guión de ciencia ficción moi orixinal, especialmente para os videoxogos daquela.
22. Theme Park (1994)
Franquía que iniciou e popularizou o divertido xénero de estratexia e xestión de parques de atraccións. O xogo combina desde a forma en que deseñamos as nosas atraccións ata aspectos máis administrativos, como contratar persoal de seguridade ou de mantemento, xestionar prezos etc. O obxectivo global consiste en lograr a felicidade dos visitantes ao tempo que obtemos beneficios. Non é tan cómodo como xogalo cun rato, pero co mando gózase.
21. Soccer Kid (1994)
Un orixinal xogo de plataformas e acción que se adaptou a moitos sistemas e no que debemos recuperar os anacos da Copa do Mundo espallados por varios países. Para iso manexamos a Soccer Kid, que co seu balón pode realizar diversos ataques e movementos inspirados no fútbol para superar os niveis.
20. Doctor Hauzer (1994)
A primeira aventura de terror completamente en 3D. A súa historia transcorre nos anos 50 e invítanos a investigar a desaparición do doutor Hauzer nunha misteriosa mansión. O xogo non saíu de Xapón e sofre unha taxa de fotogramas baixa, pero existe tradución ao castelán e o emulador permite facer overclock para corrixir a lentitude. Polo xeral non tería en conta este tipo de melloras, pero o xogo segue sendo exclusivo da 3DO e considéroo unha experiencia que non debe caer no esquecemento.
19. Lucienne’s Quest (1995)
O único RPG que recibiu a máquina fóra de Xapón e, polo tanto, o único traducido ao inglés. É un xogo cun sistema de combate por quendas clásico, pero con elementos tácticos no escenario, polo que podemos movernos para esquivar os obstáculos que nos impidan atacar. Conta, ademais, cun ciclo día/noite que afecta a algún personaxe e cunha historia simple, pero con diálogos divertidos.
18. Cannon Fodder (1994)
Un divertido e popular shooter bélico que se adaptou a moitos sistemas. Debemos manexar un pequeno pelotón de soldados por un mapa desde unha perspectiva aérea e cumprir diversas misións, como eliminar todos os inimigos ou destruír edificios.
17. Star Fighter (1996)
Un dos xogos graficamente máis sorprendentes do sistema: estamos ante un simulador de combate aéreo por amplos mapas que podemos sobrevoar libremente para cumprir obxectivos. Sorprende por ser unha contorna completamente feita con gráficos 3D texturizados e, polo que lin, cunha distancia de visión maior que nas versións de Saturn e PSX.
16. FIFA International Soccer (1994)
Outra saga que deu o salto ao 3D por primeira vez nesta consola foi FIFA, o simulador de fútbol coñecido en todo o mundo. O seu control envelleceu ben e é cómodo de xogar, ten un bo sistema de cámaras e o son ambiente está conseguido. Foi todo un salto de calidade que sentou as bases das futuras entregas da saga ata o revolucionario FIFA 98.
15. Puzzle Bobble (1995) (2 xogadores)
O clásico dos quebracabezas das recreativas: como en todas as entregas, temos que apuntar e disparar bólas contra outras da mesma cor para que estoupen antes de que nos alcancen.
14. The Horde (1994)
Este CD tráenos unha das mesturas máis curiosas e aditivas da 3DO. As fases divídense en dous tempos: no primeiro administramos a nosa vila para mellorala economicamente e colocar defensas; no segundo loitamos para protexer as nosas construcións dunha horda, nunha especie de hack'n slash. O xogo non é punteiro nin na parte estratéxica nin na de acción, pero a mestura de ambas é orixinal e divertida.
13. Alone in the Dark 2 (1995)
Esta secuela optou por un desenvolvemento máis lineal, enfocado na acción, rebaixando a dificultade dos quebracabezas e deixando nun segundo plano o concepto de terror da primeira parte. Non é un mal xogo e vai máis fluído que a primeira parte de 3DO, pero perde todo aquilo que facía única a saga.
12. Myst (1995)
Unha das mellores aventuras gráficas da historia, que tivo moitas adaptacións a outras plataformas. A de 3DO funciona de marabilla e cun control bastante bo co que apenas se bota de menos un rato. A súa historia e os seus quebracabezas son tan bos que é imprescindible para os amantes do xénero en calquera plataforma.
11. Road Rash (1994)
Outra saga que deu os seus primeiros pasos en 3D nesta máquina. Road Rash proponnos disputar carreiras ilegais en moto nas que podemos atacar os opoñentes con puñadas ou empurróns, entre outros ataques. Envelleceu bastante ben e consegue transmitir a sensación de velocidade; ten unha boa xogabilidade e unha banda sonora roqueira de calidade.
10. Killing Time (1995)
Un FPS que fai cousas ben e outras mal, pero no que, en balance, gaña o positivo. A historia e a ambientación están conseguidas e o mapa carece de tempos de carga ou de transicións entre niveis, o que dá a sensación de que nos movemos por unha área enorme. Ten un control bo e cómodo, que é onde máis adoita fallar esta consola.
9. The Need for Speed (1994)
O mellor simulador de condución da 3DO, que destacaba polos seus gráficos con polígonos texturizados, o son e unha xogabilidade perfecta para o seu ano. A súa proposta é sinxela: afrontar carreiras ilegais esquivando o tráfico e a policía. Hai oito vehículos reais e cada un compórtase dun xeito distinto.
8. Another World (1994)
Un dos representantes máis importantes dos xogos de aventuras da historia do videoxogo, que aínda hoxe conserva gran parte da súa frescura. Ten unha gran historia narrada visualmente, sen apoiarse en diálogos, que bebe moito do cine na súa posta en escena. Require certa paciencia, pois resolver as situacións require moitas veces ensaio e erro.
7. Super Wing Commander (1994)
Remake da primeira parte da saga que a mellora en todo: mellores gráficos, son, animacións e diálogos falados. Pero, sobre todo, un control ben implementado malia a limitación dos cinco botóns do mando. O xogo é un simulador de combates espaciais ao máis puro estilo Star Wars, pero entre misións podemos socializar cos nosos compañeiros de escuadrón.
6. Samurai Shodown (1994) (2 xogadores)
Un dos mellores xogos de loita con armas de Neo-Geo chegou aos circuítos da 3DO, e a crítica non se pon de acordo sobre a calidade do resultado final. É certo que non é unha versión idéntica ao orixinal, pero, obviando isto, o xogo vese e xógase de marabilla; se temos en conta os recortes que se facían noutros sistemas para levar xogos de placas arcade, podemos concluír que este Samurai Shodown é unha das mellores adaptacións.
5. Gex (1995)
Neste catálogo non abundan os xogos de plataformas, así que dicir de Gex que é o mellor de todos pode parecer pouca cousa, pero o certo é que, malia a falta de competencia, o é por méritos propios, e tamén un dos mellores xogos de plataformas 2D da xeración. Ten unha gran variedade de fases ambientadas en temáticas televisivas, nas que debemos localizar mandos de televisión para poder avanzar ata enfrontarnos ao xefe da zona.
4. Alone in the Dark (1994)
Alone in the Dark inventou o xénero survival horror cun guión inspirado nos relatos de Lovecraft. Debemos explorar con bastante liberdade unha mansión posuída polo mal e, para escapar dela, temos que resolver multitude de quebracabezas. A ambientación aínda hoxe consegue transmitir ese halo de misterio; en cambio, hai que dicir que ten unha taxa de fotogramas baixa e un control tipo tanque.
3. Wolfenstein 3D (1995)
FPS de temática nazi que popularizou o xénero en 1992. A súa adaptación chegou tarde á consola, pero á vez é unha das mellores que se fixeron. A diferenza da conversión de DOOM para 3DO, aquí a acción ocupa toda a pantalla, vai fluída e cun gran control, carece de censura, ten unha banda sonora con calidade de CD e todos os niveis da versión de PC. Para min, o shooter máis divertido e fácil de xogar da máquina.
2. Super Street Fighter II Turbo (1994) (2 xogadores)
A mellor versión do momento do clásico de loita de Capcom, que servía para demostrar a superioridade da 3DO fronte á xeración anterior de consolas. O único problema que ten esta versión é que, para xogar comodamente, precisa seis botóns frontais e o mando só trae tres, o que obriga a combinar botóns para realizar algúns ataques.
1. Star Control II (1994)
Star Control II é unha obra mestra que nos pon aos mandos dunha nave nun sandbox espacial enorme que podemos explorar con total liberdade para cumprir a misión de localizar os restos dunha tecnoloxía esquecida coa que derrotar os Ur-Quan, que tratan de escravizar todas as razas. Ao longo da nosa odisea podemos facernos inimigos ou forxar alianzas con outras especies, explorar planetas para conseguir recursos cos que comerciar e mercar melloras para a nosa nave e, por suposto, non faltan os combates espaciais ao estilo shoot'em up.